Израиль премьер-министрі Биньямин Нетаньяху Суэц каналына бәсекелес болатын автомобиль және теміржол желісі салынатынын мәлімдеді.

Израиль премьер-министрі Биньямин Нетаньяху кеше үкімет отырысында Қызыл теңіздегі Элат қаласы мен Жерорта теңізі жағалауындағы Тель-Авив арасында 350 шақырымдық автомобиль және теміржол желісін салу мәселесін көтерді. Нетаньяху жолаушылар мен жүктерді тасымалдайтын бұл жаңа жолдың сонымен қатар Азия мен Еуропа арасындағы халықаралық сауда торабы және Суэц каналына бәсекелес болатынын айтты. «Азия мен Еуропа арасында жүк тасымалдайтын желі болады. Қытай, Үндістан және басқа да дамып келе жатқан державалар бұл жолға үлкен қызығушылық танытты», - деді Израиль премьер-министрі және бұл желі құрлықаралық кездесу нүктесі болатынын айтты.

«Бұл жоба алдағы 50 жыл ішінде Израильді түбегейлі өзгертеді», - деді Нетаньяху. Жобамен Тель-Авив пен Элат арасындағы пойыз жолының 2 сағатқа қысқартылатынын атап көрсеткен Нетаньяху жобаның ұлттық және халықаралық стратегиялық маңызы бар екенін айтты. Нетаньяху алдағы уақытта бұл мәселе бойынша толығырақ талқылаулар болатынын айтты.

ҚЫТАЙЛАР ЖАСАЙДЫ

Израильдің көлік министрлігі жоба бойынша жүргізген зерттеулерде жобаның құрылысын қытайлық қоғамдық компанияларға беру идеясы бірінші орынға шыққаны айтылған. «Қытайлық компаниялардың осындай теміржол және жол құрылысы жобаларындағы кәсіби тәжірибесі өте әсерлі», - деді Израильдің көлік министрі Йизраэль Катц.

Катц 2011 жылдың қыркүйегінде Бейжіңде қытайлық әріптесімен жоба бойынша кездесіп, екі жақ ортақ ұсыныс дайындауға келісті. Француздық AFP ақпарат агенттігіне сұхбат берген израильдік лауазымды тұлғалар елдің Жерорта теңізінде өндіретін табиғи газының осы желі арқылы тікелей Үндістанға тіпті Қытайға да сатыла алатынын айтты. Израиль Жерорта теңізінде тапқан Тамар және Левиафан аймақтарында шамамен 680 триллион текше метр табиғи газ бар деп есептеледі.

Сонымен қатар, бұл жобамен Израильдің Суэц каналына тәуелділігі азайып, әлемдегі ең маңызды транзиттік нүктелердің бірі саналатын каналға байыпты балама жасайды. 1967 жылы Египет Израильге арнаны жауып тастады және бұл тыйым 1975 жылға дейін созылды.

Дереккөз: SABAH