Ресей премьер-министрі Владимир Путин мемлекеттік компаниялар келесі жылы инновациялар мен технологияға 1,5 триллион рубль (50 миллиард доллар) инвестиция салатынын мәлімдеді.
Ол Ресейдің Ленинград облысындағы пойыз вагондарын шығаратын зауытты аралап, құзырлы орындардан ақпарат алды. Вагондардың біріне аты-жөнін жазып қол қойған Путин инновация және озық технология саласында құрылған үкіметтік комиссия отырысына қатысты.
Мемлекеттік компаниялардың инновациялық бағдарламаларда жетекші рөл атқаруы керектігін білдірген Ресей Премьер-министрі «Алдағы он жылда Ресей өнеркәсіп өндірісіндегі инновациялық мақсатты өндіріс үлесі 4,5-5 пайыздан 25-30 пайызға дейін артуы керек. 2020 жылға қарай ғылыми-зерттеу және тәжірибелік-конструкторлық зерттеулерге бөлінетін үлес жалпы ұлттық өнімнің 2,5-3 пайызына дейін ұлғайтылады. Өкінішке орай, қазір ол 1,16 пайызды құрап отыр», - деді ол.
Дәстүрліні жаңғыртып, жаңаларын жасаудың міндетті екеніне назар аударған Путин инновациялық зерттеулерге жобалық негізде қолдау көрсету керектігін және мемлекеттік компаниялардың әсіресе тәуекелді салаларда катализатор болуы керектігін айтты.
Энергетика, ақпараттық технологиялар, байланыс, биомедициналық және ядролық технологиялар бес басым сектор екенін атап өткен Ресей Премьер-министрі компаниялардың топ-менеджерлерінің жалақысы олардың негізгі инновациялық зерттеулердегі табыстарымен байланысты болғанын қалайды.
Дереккөз: News Actual
Бірінші болып пікір айтыңыз